最近捷克足球丙級聯賽球會FK Usti nad Labem因為一單「奇怪」轉會交易引起關注，事關佢哋簽下一名從未踢過波嘅22歲大學生，並唔係因為見到呢位學生哥潛力無限，而係因佢爸爸「贊助」咗球會17萬港元。

據外媒《Daily Mail》報導，捷克22歲大生學Martin Podhajsky從未踢過足球，唯一同足球有些少關連嘅就係玩過《FIFA》，不過就非常憧憬成為一名職業足球員。佢爸爸知道後馬上聯絡FK Usti nad Labem，以50萬捷克克朗（約17萬港元）贊助費將阿仔送入球會，跳過晒一般職業球員需要嘅培訓，而且唔係齋掛名，仲有機會落場踢。目前FK Usti nad Labem已計劃畀佢接替隊長一職，以前峰身份上場10分鐘，於春季首度亮相前與球隊一齊訓練。

對此，FK Usti nad Labem主席Premysl Kuban就好誠實咁話：「佢從未踢過波，只係喺電腦上玩過《FIFA》。不過，你唔會每日都見到有50萬捷克克朗喺地上碌，如果有人畀得出咁多錢，我會批准任何人加入。」而iDNES.cz民調亦顯示，高達61%網民都認為咁樣做係冇問題，而且達至雙贏局面，不過都有24%網民認為呢件事好諷刺，唔知大家又點睇呢？