距離《薩爾達傳說 王國之淚》正式發售已經4個多月，相信唔少機迷已經爆晒機坐等追加內容，又或者努力完成緊100%全成就。然而，最近遊戲製作人青沼英二及製作總監藤林秀麿接受《Fami通》訪問時就表示，開發團隊已經傾盡全力製作《王國之淚》，目前並沒有推出DLC嘅打算。

青沼英二表示：「其實今次我哋之所以推出《曠野之息》續作（即《王國之淚》），係因為我哋認為喺海拉魯世界體驗新嘅遊戲內容係非常有價值。如果未來有新嘅理由出現，我哋可能會再次回到海拉魯世界，不論係續作定還是全新作品，都會帶畀玩家全新嘅遊戲體驗，希望大家期待。」而藤林秀麿亦透露，團隊已經構思緊「下一次有趣體驗」，但目前尚未確定具體形式及內容。