經過《星際牛仔》、美版《死亡筆記》等失敗案例後，Netflix終於憑住《ONE PIECE》打破漫改真人版魔咒，贏盡口碑及收視！唔知大家覺得好唔好睇呢，又期望下季有咩地方可以改善？

由尾田榮一郎親自監製嘅Netflix真人版《ONE PIECE》上周四正式播出，短短幾日已火速登上全球84個國家及地區Netflix收視排行榜冠軍，並於Rotten Tomatoes（爛番茄）分別獲得83%影評人評分及96%觀眾評分超高評價，而IMDb方面亦獲得8.5/10評分。比起過往負評如潮嘅真人版《Cowboy Bebop（星際牛仔）》及《Death Note（死亡筆記）》，今次Netflix可謂成功打破「真人化=爛」嘅魔咒，甚至為漫改作品樹立全新標竿。

綜合觀眾評價，唔少人都稱讚角色還原度高，雖然部份情節有所更動，但仍能保留原作嘅精神及情感，而且故事引人入勝，對於老Fans及新觀眾嚟講都係一場有趣嘅冒險。不過，都有觀眾認為，相比起Netflix另一部真人版作品《Cowboy Bebop》，《ONE PIECE》畀人嘅感覺更加平淡同普通。

考慮到節目大受歡迎，相信Netflix如無意外都會續訂第二季。按照最後一集片尾伏筆以及原著劇情，預計第二季將會講述路飛一行人將正式進入偉大航道，招募索柏（喬巴）及拯救雪花石膏王國（阿拉巴斯坦），過程中會對上時任「王下七武海」沙·鱷魚，以及海軍上校史莫卡（煙男），但詳情仍有待官方正式宣布。