動漫之所以好睇，其中一個原因就係佢哋脫離現實世界嘅限制，無論幾天馬行空嘅能力、科技、劇情都能夠自圓其說。但隨住現實科技發展，某啲動漫中出現嘅「空想科技」原來已經可以實現。好似外國著名YouTuber「JLaservideo」近日就自製咗個來自《進擊的巨人》嘅立體機動裝置，仲成功利用裝置完成瞬間爬牆！

於YouTube上擁有近380萬訂閱嘅「JLaservideo」，過去亦曾重現無數動漫、電影中嘅「高科技」，例如佢曾經整過真係識彈返轉頭嘅「美國隊長盾」、《Iron Man 2》中出現嘅手提箱裝甲、又或者係《蜘蛛俠》嘅蜘蛛絲噴射器等。而佢嘅最新影片，就係嘗試重現《進擊的巨人》嘅立體機動裝置。佢先研發出利用壓縮空氣發射飛鏢嘅機制，再於飛鏢上綁上繩索，然後將繩索另一端連接到固定於後腰嘅電動摩打，中途仲好順手咁整埋真係能彈射刀刃嘅雙刀。最後仲真係用呢個「立體機動裝置」由地下沿外牆瞬間爬上二樓，高度還原動漫內嘅效果。

但講就容易，實際上「JLaservideo」於影片中遇到大量設計及工程問題，而佢亦只能利用自己嘅知識以及不停試錯逐一解決。另外整出個可用嘅「立體機動裝置」係一回事，實際上運用又係一回事。從試用片段中可以見到「立體機動裝置」其實非常講求使用者嘅身體平衡以及人機合一，「JLaservideo」試用時就多次撞牆。想做到兵長咁流暢戰鬥真係唔易架！