早幾日同大家分享過日本網站舉行嘅「結局最精彩的高達動畫」票選後，唔少人都贊同《機動武鬥傳 G高達》的確非常經典。但比起最後一集嘅「石破LOVE LOVE天驚拳」，大家似乎更喜愛「東方不敗」呢個角色。既然大家咁鍾意佢，咁知道Bandai有推出佢嘅主題服飾後，應該會即刻入手啦可？

話說Bandai旗下有個專門推出動漫主題服飾嘅「Bandai Fashion Collection」，其中當然有以各《高達》作品為主題嘅系列。而近日官方就宣佈會推出以《G高達》中嘅「紅心King」為主題嘅服飾，但有趣嘅係，佢哋講緊嘅「紅心King」唔係主角杜門，而係佢師傅、上代「紅心King」東方不敗！因為整個系列除咗一對手套、一件T恤係印上「紅心King」標誌之外，其餘產品包括「東方不敗Cap帽」、「超級霸王電影彈T恤」以及「石破天驚拳T恤」，通通都係以東方不敗為主。

售價方面，T恤款最貴係4,400Yen一件 (約HK$235)、Cap帽4,070Yen (約HK$220)，手套就只需1,738Yen (約HK$93)，都算係相當宜人。問題係呢幾件產品嘅質素睇落頗為低下，除咗啲印花單調之外，淨係睇官方圖都見到啲白色T恤透哂底。唔知各位對東方不敗嘅愛，足唔足夠支持你哋課金啦。

資料來源：Bandai