縱然《Barbie》及《Oppenheimer》兩部電影票房出乎預期地好，但其實縱觀今年嘅荷里活電影表現，依然未走出「後疫情」嘅陰霾。事實唔計「Barbieheimer」嘅話，今年多部高成本最後都係蝕錢收場。好似近日有報導指，6月尾上映嘅《奪寶奇兵5》，以及7月中上映嘅《Mission Impossible 7》，雖然票房數字睇落唔錯，但最終埋單可能都要各蝕一億。

《Indiana Jones and the Dial of Destiny》

圖片：IMDB

據最新票房數字，上映6個星期嘅《奪5》全球票房達到3.75億美金，而上映5個星期嘅《MI7》更有5.23億，似乎就唔算太差。但事實上呢兩部電影嘅製作成本分別高達3億美金，再加上預計至少一億美金嘅全球宣傳費、以及院線分成，據知情人士估計，如果單計票房，兩部電影最終起碼各蝕1億。

兩部電影嘅製作成本之所以咁高，除咗因為演員薪酬、特效場面之類真正與製作相關嘅因素外。更重要嘅係兩部電影都係於疫情期間製作。多次停工、隔離以及相應嘅防疫措施都不停拉高電影製作成本。另一邊廂，俄羅斯及中國兩個重大海外票房又因為各自嘅因素而大幅萎縮。好似全球收近8億美金嘅《MI6》，當中有1.4億就係來自中國，但黎到《MI7》，中國票房就跌到得返4800萬。

《Mission: Impossible - Dead Reckoning Part One》

圖片：IMDB

不過，近年片商除咗靠票房回本外，亦可以靠自己串流平台增加收入。例如Disney主席Bob Iger早前就表示，雖然《奪5》成本真係好高，但同時亦吸引大量人於Disney+上回看過去嘅《奪寶奇兵》電影。所以即使票房遜於預期，片商仍有可能透過串流平台，長遠地賺返啲錢返黎。

高成本製作越黎越難賺錢，或者就係荷里活片商們早前與演員、編劇工會就薪酬談判時企硬嘅原因之一。但其實無論最後加唔加人工，大罷工本身就已經會拉高製作成本。據不具名嘅片商高層透露，每罷工一個月，目前製作中嘅作品成本就會增加200萬美金。換個角度講，就即係片商們短期內都冇辦法有效地壓低成本，回本難度依然高企。

資料來源：Variety