動漫改編真人版影視作品近年大為盛行，但絕大部份改編作嘅成績、口碑都相當慘淡，更令觀眾之間出現「慘遭真人化」嘅說法。而4月上映，由日本東映製作、新田真剣佑主演嘅真人版《聖鬥士星矢 The Beginning》亦唔例外。據東映最新公佈嘅2023年第一季財政報告，因為《聖》嘅票房失利，令公司利潤暴跌，甚至連即將播放嘅真人版《ONE PIECE》都不被看好。

據東映近日發佈嘅第一季 (4月至6月) 財政報告，雖然整體銷售額比去年同期增長一成，但利潤就暴跌49%，僅約20億9500萬Yen，即約1400萬美金左右。而且報告中寫到明，利潤下跌嘅原因，係「《聖鬥士星矢 The Beginning》嘅存貨價值損失」。由於一部電影理論上係唔會有「存貨」，所以講到尾就即係東映認為已經無法收回《聖》嘅6000萬美金投資，所以將成本劃為「損失」。再簡單啲講，就即係《聖》嘅大爆死令東映蝕到入哂肉。

新田真剣佑飾索隆 (右)

值得一提嘅係，《聖》雖然係由荷里活製作，但就由東映100%出資，所以所有損失都係由東映自己食哂。而更重要嘅係，黎緊會播嘅真人版《ONE PIECE》與《聖》有多個相似之處，例如都係東映版權作品、都係東映自己出資、都係去咗荷里活拍、都係人氣漫畫改編真人版，以及無獨有偶地都係有新田真剣佑份 (《ONE PIECE》中飾演索隆)。而據早前報導，真人版《ONE PIECE》每集製作費高達1800萬美金，第一季總共有8集，加埋就即係近1.5億，你話若然反應都好似《聖》咁呢……

資料來源：FLASH