雖然已經上映咗超過三個星期，而且早前於日本產生爭議，但「Barbieheimer」熱潮於全球依然強勁。最新數據更顯示《Barbie》嘅全球票房已經突破10億美金。除咗令電影成為2023年第二賣座電影 (目前第一為《The Super Mario Bros. Movie》)，更令導演Greta Gerwig成為首位憑單部電影突破10億票房嘅女導演。有趣嘅係，當初Margot向Warner Bros. (WB)推銷電影時曾「誇下海口」，指電影會有10億票房，結果真係開口中。

早前Margot Robbie接受訪問時，曾提到電影於籌備階段、等候WB首肯正式開拍時，曾親自向高層們推銷電影以及導演Greta Gerwig。佢回憶道：「我喺個『綠燈會議』不停提醒佢哋，過去當片商有勇氣將一個好嘅創意，搭配一個有視野嘅導演時，曾經搵過幾多錢。然後我就舉例，有恐龍同Steven Spielberg啦，仲有呢個嗰個啦，基本上就係數哂所有曾經搵大錢嘅組合出黎，然後我就話：『依家你有Barbie同Greta Gerwig！』我記得我仲講過套戲會有10億票房，可能係吹大咗嘅，但我要拍得成部戲嘛！」

事實上《Barbie》上映前，預計首週北美票房「僅為」6250萬美金左右，可見其實大家都唔相信最終會有「10億」。但隨住首週北美票房高開達1.55億美金，全球票房達3.7億，再加上「Barbeiheimer」嘅協同效應，最新票房顯示《Barbie》全球票房已突破10億美金，更有望超越《The Super Mario Bros. Movie》成為本年度票房冠軍。

至於《Oppenheimer》雖然被《Barbie》比下去，但其實票房亦遠勝預期，目前全球收5.5億美金，為本年度票房第七，而且距離第六名嘅《The Little Mermaid》僅差千令萬。

資料來源：Collider、Box office mojo