MCU第五階段首部劇集《Secret Invasion》日前正式迎來大結局，不過評價就麻麻哋，目前於Rotten Tomatoes（爛番茄）上分別獲得56%新鮮度及60%影迷評分，成為MCU口碑最差嘅劇集（For參考：《SHE-HULK》新鮮度為77%），其中最後一集「Home」更只有10%新鮮度，創下MCU劇集中單集評分最低紀錄。

唔少評論認為，雖然演員陣容非常出色，劇中亦有唔少驚心動魄時刻，然而集數有限，限制咗角色嘅成長及子情節發展，導致結局倉促，好多懸念未能解決，期望中嘅政治陰謀亦未有呈現，剩低嘅只係一場CGI大戰。

據外媒《Forbes》指出，《Secret Invasion》首季六集共耗資2.12億美元製作，除咗係近期荷里活大作《奧本海默》嘅兩倍，成本亦拍得上自家製作《蟻俠3》（2億美元）、《雷神奇俠4》（2.5億美元）及《黑豹2》（2.5億美元）。

迪士尼行政總裁Bob Iger早前接受訪問時承認，近年Marvel作品表現確實未如理想，儘管產量增加，但未有取得任何顯著成就，預計未來幾年會減少Marvel及《Star Wars》作品預算及產出，期望節省成本之餘，同時集中火力提升節目品質。