無論係習慣也好、有咩特別回憶也好，相信大家心目中都有個極有好感嘅品牌，無論發生咩事你都會繼續幫襯。而近日日本網絡就掀起一陣「支持山崎麵包」熱潮，就連日本熟女女優白木優子都留言表示感謝。究竟日本山崎麵包做咗啲咩好事呢？

助け合い、ありがとう。の精神ですね

— 白木優子 YukoShiraki (@shiraki_yuuko) July 9, 2023

卻說日本情報Twitter「最多情報局」日前上傳咗幾張關於日本山崎麵包嘅照片，並留言表示為「大家要積極幫襯山崎麵包嘅理由」。而佢發佈嘅幾張圖，就係山崎麵包嘅自家貨車出入地震、暴風雪災區嘅照片，當中尤以兩張地震災區圖最為震撼，只見山崎麵包車孤獨地穿越一片頹垣敗瓦，為災民運送麵包等重要口糧。而另一張暴風雪災區圖，地面嘅雪幾乎蓋過整個貨車輪胎，為咗落貨，山崎麵包嘅職員似乎仲要自行掘走貨車後方嘅積雪。

此帖文一出，除咗吸引到如白木優子等大量網民表示感謝、稱為山崎麵包為「現代麵包超人」外，亦吸引到唔少曾受山崎麵包嘅人、員工留言。有前災民表示地震5日後，雖然道路完成清理，但由於汽油只供緊急車輛使用、超市便利店亦遭到破獲，所以災民們無辦法搵到食物，而山崎麵包就及時將食物送到避難中心，解決災民燃眉之急；亦有分享東北大地震 (福島地震) 、又或兩年前因大雪被困北陸高速道時，同樣收到山崎麵包嘅支援。

留言中亦有人稱自己為山崎麵包嘅前員工，表示某次地震後雖然停電，但佢哋靠後備發電機等裝備，24小時趕製麵包送往災區，好開心可以幫到災民。