為慶祝經典科幻美劇《X檔案（The X-Files）》30周年，劇集主創Chris Carter日前喺Podcast節目透露，《黑豹》系列導演兼編劇Ryan Coogler正在開發全新多元化版本《X檔案》，換言之可能會由非白人演員飾演莫探員（Agent Mulder）及郭探員（Agent Scully）。目前Ryan Coogler經理人公司及原劇集製作公司20th Television拒絕評論上述消息。

由於劇集仍處於早期開發階段，暫時未知會喺邊個電視台或串流平台播出，但考慮到迪士尼早些年已收購咗20th Century Studios，20th Television唔再隸屬於FOX，而且Ryan Coogler又同迪士尼有五年合約在身，所以新版《X檔案》應該唔會再喺FOX播出。

《X檔案》於1993年至2002年間在FOX電視台播出，共有九季。故事講述深信外星人存在嘅Fox Mulder，以及堅信科學能解答一切問題嘅Dana Scully被分配調查各種不可思議事件，包括超自然現象、外星生命、陰謀論等等。節劇播出後得到廣泛好評及高收視率，並榮獲艾美獎及金球獎，除此之外，劇集主題曲亦係一大經典，就算冇睇過套劇都一定聽過。

資料來源：variety