早前同大家提及過，CAPCOM為宣傳新作《生化危機 4 重製版》，推出惡搞動畫宣傳片《RE名作劇場：不思議村子裡的里昂》，以「世界名作劇場」畫風趣怪還原遊戲劇情。第二話今日正式出爐，今次係惡搞經典場面「Leon Help~」！

第二話標題名為「二人的約定」，Leon含情脈脈咁叮囑Ashley唔好離開佢身邊，點知轉個頭Ashley就被邪教徒捉走，並不斷高呼原作名句「Leon Help！」，Leon反反覆覆多次營救Ashley搞到成身傷晒，最後仲包到成身繃帶得返隻眼，反映唔少玩家嘅心聲。

《生化危機4 重製版》目前已開放預購，3月24日正式登陸PS4/5、Xbox Series X/S及Steam等多個平台。