即將喺《Deadpool 3》強勢回歸嘅Hugh Jackman日前透露，過去二十年多年因為多次扮演狼人不斷咆哮，導致聲帶受損。

音樂劇演員出身嘅Hugh Jackman，過去二十多年曾出演九次超級英雄角色「狼人（Wolverine）」，其粗曠野性形象深入民心，幾乎同狼人一角完全畫上等號，甚至創下健力士世界紀錄，成為飾演Marvel角色最長時間演員。然而，無數讚賞及榮譽背後，狼人一角亦為佢身體帶嚟傷害。

Hugh Jackman日前接受BBC節目《Front Row》訪問時透露，由於飾演狼人需要經常用力咆哮及大叫，導致聲帶造成永久傷害，而家佢嘅假音已經冇以前咁勁。並表示，雖然佢曾經喺戲劇學校學過咆哮技巧，以及唔傷聲帶嘅情況下大叫，可惜最後並冇大派用場，仲講笑咁話：「我扮演狼人時所做嘅事一定會嚇親我嘅聲樂老師。」但影迷們又唔使太擔心，Hugh Jackman表示目前已經搵咗位歌唱老師學習發聲技巧。

除咗學習發聲技巧，Hugh Jackman近期亦積極操肌，為再度飾演狼人做足準備，《Deadpool 3》預計2024年11月8日上映。

View this post on Instagram

A post shared by Hugh Jackman (@thehughjackman)