近年香港電影掀起一股謝票潮，唔少電影由一上映開始就搵黎台前幕後走訪全港戲院與觀眾見面，甚至有「票房到幾多我哋就做啲咩」嘅慣例。而近日Tom Cruise亦因應《Top Gun: Maverick》嘅票房好成績而進行謝票活動，不過佢嘅謝票方法就充滿「Tom Cruise風格」，因為佢係跳住傘黎謝票。

2022踏入最後兩個星期，《Top Gun: Maverick》幾乎篤定會成為今年年度票房冠軍，而發行商Paramount日前就於YouTube上傳咗一條Tom Cruise謝票片。條片一開始就見到Tom Cruise坐喺架半空中嘅直升機上面，並表示佢哋依家喺南非嘅上空進行緊《Mission Impossible: Dead Reckoning》上下兩部 (即MI7 及MI8) 嘅拍攝工作，但佢「想喺今年完結之前多謝你哋去戲院睇戲，支持《Top Gun: Marverick》。」

隨後佢就被《MI7》及《MI8》嘅導演Christopher McQuarrie打斷，提醒佢哋仲有嘢拍，叫佢咋咋聲講埋就好跳落去。於是Tom Cruise立即同攝影機跳出直升機，並於自由落體期間繼續多謝觀眾：「多謝大家支持，多謝你哋畀我娛樂你哋，呢個係我畢生嘅榮譽。好啦我唔夠高度啦，我仲要拍埋呢個Shot。祝大家有個安全同開心嘅假期，戲院見啦！」然後就飛離開鏡頭。成個過程輕鬆過我落街買嘢食。

講起《MI7》，Paramount昨日亦釋出咗電影嘅製作花絮。卻說電影中Tom Cruise要完成一個「喺山邊揸電單車飛出山崖進行定點跳傘」嘅特技埸面，而為咗完成呢個特技，Tom Cruise及拍攝團隊先進行咗N次跳傘 (相信上面條謝票片就係呢個時段拍嘅)、再進行咗N次電單車跳躍，最後將兩樣嘢夾埋進行正式拍攝。花絮中表示，正式拍攝當日，Tom Cruise親身上陣進行咗六次「飛出崖跳傘」特技，導演Christopher McQuarrie仲話呢個係佢拍攝生崖中最恐怖嘅特技，唯一比呢個更恐佈嘅，就係佢哋計劃為《MI8》進行嘅特技。