金像導演James Cameron睽違13年科幻鉅作《阿凡達：水之道》日前正式上映，再次為影迷帶嚟奇幻觀影體驗，上映唔夠一周全球票房已突破4.35億美元，最終能否打破前作紀錄仍然係未知之數，但戲組似乎已經著手第三集製作。

最近資深娛樂記者Jeff Sneider喺Podcast節目透露，《阿凡達 3》已經煞科並完成初步剪輯，片長約9小時：「最近有人同我講，James Cameron上個禮拜已向二十世紀影業交出《阿凡達3》初步剪輯，唔係講笑，足足長達9個鐘！而且佢堅持完成大部份後製特效，先正式開始剪輯工作。」換言之就係超級燒錢。

雖然最終版本應該就無咩可能會9個鐘，事關對影迷同戲院嚟講都一大挑戰（要清潔、放映場數亦變相少咗好多），後續一定會修改及調整時長，但可想而知第三集嘅故事規模非常龐大。順帶一提，早排James Cameron就講過，如果《阿凡達：水之道》票房未如理想，《阿凡達3》將會係整個系列嘅大結局，究竟呢個IP可以走到幾遠，就要睇下影迷有幾支持喇。