據外媒《The Wrap》獨家報導，狂野時速系列第十集《Fast X》預算已激增至3.4億美元，比起上集《F9》嘅2億美元高出70%，有望成為有史以嚟製作成本第四高電影，直迫《復仇者聯盟4：終局之戰》(3.56億美元)、《復仇者聯盟2：奧創紀元》(3.65億美元)以及《加勒比海盜：魔盜狂潮》(3.79億美元)。

報導指出，製作成本激增源自全球通貨膨脹及演員片酬上漲，除咗主角Vin Diesel回歸，今次更邀請到「水行俠」Jason Momoa、「Marvel隊長」Brie Larson、《自殺突擊隊：集結》「捕鼠人2」Daniela Melchior等當紅影星。另外，林詣彬導演開鏡後一周突然退出拍攝，亦導致電影製作成本上升，目前片商環球影業已搵嚟《Now You See Me（非常盜）》導演Louis Leterrier接手。

考慮到前作《F9》喺疫情期間上映亦能大收7.26億美元票房，相信《Fast X》製作成本高達3.4億美元都唔會蝕本嘅。唔知今次會帶畀觀眾乜嘢驚喜呢？