據美國媒體報導，哈利王子及其夫人梅根近來「驚慌地」要求Netflix大幅刪減其個人紀錄片嘅內容，其刪減程度甚至「等同下架整個節目」。而Netflix，以及由哈利夫婦成立嘅製作團隊就企硬保留內容。

圖片：Wikicommons

自2020年宣佈「脫離王室」後，哈利王子及梅根就去咗美國展開新生活，而佢哋其中一個工作 (搵錢方法)，就係成立製作公司Archewell，並與Netflix簽下協議，製作包括佢哋個人紀錄片嘅一系列節目，其中佢哋嘅個人紀錄片，更係早於一年前就已經開始拍攝。不過美國媒體《PageSix》就引述匿名嘅消息人士，指哈利夫婦近日「驚慌地」希望自己嘅製作團隊以及Netflix大量刪減紀錄片內容，甚至係「由佢哋自己把口講出黎、自己拍、最普通嘅內容」都希望刪減。

據指如果真係按哈利夫婦嘅意願去刪減紀錄片內容，「基本上就即係唔好播」，所以無論係Netflix，以至哈利夫婦自己嘅製作團隊都力爭保留內容。

圖片：Wikicommons

有指今次唔係哈利夫婦第一次嘗試修改紀錄片內容，據知早前英女王伊莉沙白二世離世後，夫婦二人就已經要求修改，最新消息更指佢哋早於英女王離世前其實就已經改緊。至於修改內容嘅原因，好可能與佢哋兩個子女Archie及Lilibet嘅王室頭銜有關。據知英女王生前承諾會賜王室頭銜予兩位玄孫，但新上任嘅英王、哈利老豆查理斯三世就打算睇埋哈利王子準備出版嘅回憶錄、以及Netflix套紀錄片先再作決定。