近日多間外媒報導，早於今年3月煞科、耗資近9000萬美元嘅《Batgirl》已被華納兄弟完全放棄，唔單只唔喺戲院上映，就連串流平台亦唔會上架。

綜合外媒報導，由拉丁裔歌手Leslie Grace主演嘅DC超級英雄電影《Batgirl》最初鎖定為一部串流平台上映嘅中型電影，預算為7000萬美元，但拍攝期間因疫情影響而令成本上漲至9000萬美元。然而，隨住華納與Discovery合併，新任CEO上場及高層改組，公司將發展重心重回院線市場，並希望往後嘅DC電影都能夠以商業大片規模發行，《Batgirl》呢類規模靠小嘅製作自不然唔符合公司營運方針。

除此之外，外媒《The New York Post》亦引述消息人士指出，《Batgirl》初期試映評價認真麻麻，甚至差到「冇得救」嘅程度，為避免虧損更多(院線上映需要再花數千萬宣傳費)以及維護DC聲譽，所以決定放棄《Batgirl》。

DC電影《Batgirl》以第二代「Batgirl」Barbara Gordon為原型，由《Bad Boys for Life（重案夢幻再重組）》導演Adil El Arbi、Bilall Fallah執導，《Bumblebee（大黃蜂）》編劇Christina Hodson撰寫劇本。