相信唔少模型迷都俾另一半或屋企人鬧過：「你唔好成日買埋啲垃圾、唔等使嘅嘢啦！」最近日本模型廠SYUTO就真係出咗件「垃圾」，如果買返嚟砌，你都咪話唔吹脹。

曾推出「壽司模型」嘅日本廠商StudioSYUTO又有新搞作，今次聯同無用發明家藤原麻里菜製作出1:1比例「垃圾組裝模型」，外觀同一般廢紙球無異，高約4cm，並採用100%再生材質打造。值得一提嘅係，呢款模型並冇組裝說明書，玩家要好似砌砌圖咁不斷trial and error，享受與別不同嘅組裝樂趣。

「垃圾組裝模型」價錢為1,540日元（約HK$90），每盒包含兩顆塑膠紙球，預計2022年12月正式發售，有興趣嘅朋友可以到GOODSMILE網上商店了解更多。