PS5嘅由推出至今都一直存在供貨問題，「買唔到PS5」先係一眾機迷嘅「正常狀態」。過往我哋都曾經分析過PS5及PS4嘅同時期出貨數據其實相差不遠，換言之唔係Sony整出黎嘅PS5特別少，係啲PS5整咗出黎之後唔知賣咗去邊。近日日本《ITmedia》就訪問咗一個從事轉售事業 (即係水貨) 十年嘅男子，而佢就確認咗大家對於啲PS5去向嘅猜測——中國。

據呢位水貨客表示，原價54,978 Yen一部嘅PS5，去年年尾喺中國可以賣到10萬Yen，就算到依家都仲賣到八萬Yen一部，換言之每部PS5都賺到二萬Yen (約HK$1150)，而且因為日元貶值，但賣去中國係收人仔嘅關係，計落仲賺埋個匯率，簡而言之就係「走私日本PS5去中國可以謀取暴利」。

水貨容亦提到，較早前Sony曾經話過會增加PS5嘅產量，但佢指出一眾水貨客買到PS5後，絕大多數都係出售到國外，極少會出售予日本本土玩家，換言之就算PS5增產，實際能夠買到PS5嘅日本用家依然都唔會多，同時亦會令Sony及經銷商無法評估日本玩家嘅實際需求 (賣咗好多出去，但依然有好大買唔到)。

佢亦指出，即使如《Elden Ring》般嘅大熱遊戲，其PS5版本於日本嘅銷量都只係10令萬隻，與Sony數據指PS5於日本本土賣咗過百萬部根本就唔成正比。一方面證明擁有PS5嘅日本玩家人數並不如想像中多，二來要發揮PS5嘅機能優勢——即係4K甚至8K畫面，玩家需要有相應嘅電視或螢幕配合，換言之「玩PS5」嘅成本會更加貴。另一邊廂，當絕大部遊戲都兼容PS4時，PS5對於玩家亦並非必須。總結起黎就係玩家唔一定要買PS5，令PS5變成投機商品，連水貨客都分唔清究竟邊個係真正嘅PS5用家。