落雨嘅香港係一個令人非常煩燥嘅地方，一來落雨本身就已經好煩啦，二來香港咁耐都仲未有擔遮要考牌嘅制度啦，三來明明你好乖咁帶遮出街，次次唔係被人拎咗把遮就係唔知漏咗喺邊。咁你話除咗移民之外仲有冇方法解決呢個問題？有，就係唔擔遮！著雨褸！仲係由STRICT-G同丹麥雨具品牌RAINS聯乘推出嘅雨褸！

丹麥係一個每年有大半時間都落緊雨嘅地方，而且憑親身經驗黎睇，當地人係唔興擔遮嘅，出街大多都係著雨褸 (又或者無視啲雨)，所以RAINS對於雨褸都可以話係專家。而今次佢哋同STRICT-G聯乘嘅雨褸，分別有聯邦軍同自護軍兩款，除咗顏色唔同之外，外觀上最大分別就係左胸前嘅低調印花紋章。剪裁方面就採用長褸設計，而且睇落都幾修身，應該唔會好似小學雞著雨褸咁嘅。

同一個聯乘系列除咗雨螻之外，仲有個「Mini Backpacks」，外層物料同樣係防水物料，保護你袋入面嘅物品，而且採用薄身設計，相信係考慮到背包太厚身會走出把遮嘅範圍結果濕哂。兩款雨褸售價分別為19,800Yen (約HK$1155)、Mini BackPacks售價為16,500Yen (約HK$960)。

資料來源：STRICT-G