Johnny Depp控告Amber Heard誹謗案 (以及AH反告JD誹謗案) 終於有結果！自上週控辯雙方於庭上出示所有證據及證詞後，7位陪審團經過前後三日、總時數超過13個鐘嘅商議，終於於香港時間週四凌晨達成共識：JD勝訴！

作為背景資料，JD控告AH於2018年於《The Washington Post》上發表專欄文章對其構成誹謗，實際上係指專欄文章中包括標題嘅三段文字，而每段文字又需要陪審團一致認為符合前後7個要求，包括「該陳述由AH作出」、「該陳述為錯」、「該陳述對JD造成捐失」以及「AH作出該陳述時有『真實惡意』 (即明知係錯都照寫出黎)」等，先算真係誹謗。而陪審團經過商議後認為三段文字全數符合所有條件，確實對JD構成誹謗，故判JD勝訴，並能從AH獲得損失性賠償1000萬美金，以及懲罰性賠償500萬美金。但法官因應維珍尼亞州法例，而將懲罰性賠償減至上限35萬美金，換言之JD總獲得賠償為1035萬美金。

至於AH對JD嘅反告，陪審團則其中三條陳述中嘅其中一條符合所有條件，並對AH構成誹謗，故判AH勝訴，獲200萬美金賠償，至於懲罰性賠償則為0。

簡而言之，就係JD大勝兼獲835萬美金賠償(獲賠1035萬，減要賠畀AH嘅200萬)。

法庭宣佈JD勝訴後，被網民稱為「雷神」嘅JD方律師Camille Vasquez與Benjamin Chew握手、擁抱慶祝，期間Camille Vasquez以手扇眼，似乎係有啲想喊

值得一提嘅係，法庭原本宣佈會於當地時間下午3點開庭宣判，但當開庭後，法官發現陪審團並無於判決書上寫上JD應獲得嘅賠償金額，故將判決書發還陪審團重填，最後延至下午3時20分左右先正式宣判。

由於JD身在英國，並無親身出庭聽取判決，所以法庭焦點都集中於有出庭嘅AH身上。當法庭宣判JD勝訴時，AH低頭扁貌似想喊 (但冇喊)，就算後來法庭宣佈AH其中一條反告勝訴，佢亦繼續慘樣。