近日傳出一個令海內外電視劇迷震驚消息，話說亞視可一不可再巔峰劇作《我和殭屍有個約會》傳出翻拍會分電影版同翻拍電視版，其實重拍翻拍改篇都唔稀奇，奇在呢部1998年播出作品去到2022年居然想原班人馬重新翻拍新電視版，「香港鬼才編劇」陳十三身兼監製、編劇及導演，帶領當年演員萬綺雯、尹天照、楊恭如、吳廷燁、張文慈等重新再拍多次你睇，我計過以上5人平均年齡53.4歲，除左經典我嫁咗畀佢都可以同你一齊的楊恭如48歲，其他演員全部50歲以上，不過如今社會並不歧視年齡，60歲都係青年人，海內外震驚的最大原因可能係經典作要因為內地過檢禁拍奇幻題材而要改名作《我和馬小玲有個約會》，劇情唔知會否因為電檢改為一班人精神失常以為自己係殭屍，最後經國家醫返好！總之你點搞其實都無所謂，但原班人馬再改名我和馬小玲有個約會十月真係拍得出就真正奇幻！

電影翻拍話搵黃宗澤擔正演「況天佑」，不過聲勢同話題肯定不及話要原班人馬回歸的電視版，所以論價值我地只討論翻拍電視劇版，據指「香港鬼才編劇」陳十三將會身兼監製、編劇及導演，計劃今年10月於香港開拍全新《我和馬小玲有個約會》。假如成功開拍最終未知由邊個電視台播出，不過據網民估計最大機會應該係接替亞視的大台無線播出！原版《我和殭屍有個約會》第一季度首集1998年11月30日首播，係一部非常成功集殭屍、驅魔、驚嚇、激情、浪漫、靈異、動作及特技的奇幻劇。原故事時間線剛好由盤古初開去到下年2024年時段，故事拍左三輯極受全球華人歡迎，是為香港電視劇經典作品！

如此巔峰劇作要改篇、要重拍屬於可以理解兼合情合理，但重新拍多次又居然原班人馬，同一個角色同一個演員同一個拍法，不如到時搞埋畫中畫一路對比舊作講多一次一樣對白對比下，肯定係電視史上新噱頭！當然大家要相信鬼才陳十三，相信佢係會展示同一故事在中國電檢下會如何作國家級合理大修改！單睇呢點都已經可以作時代之革命性電視劇大對比！《我和馬小玲有個約會》大家都等住睇你表現！！