由於審查問題，近年多部迪士尼電影均無緣中國龐大市場，《黑寡婦》、《尚氣》、《永恆族》以及《奇異博士2》等大作通通都冇份！日前迪士尼CEO Bob Chapek就喺財報會議回應股東，認為就算冇咗中國市場，迪士尼電影都能夠成功(票房大賣)，之不過呢...新戲仍然會繼續送審。

據外媒《IGN》及《Deadline》報導，日前迪士尼CEO Bob Chapek喺財報會議上，被問到公司近年旗下多部電影未能打入中國市場嗰陣，佢就向股東們承認喺中國發行電影確實有難道，表示中國無論喺商業定政治角度上都非常複雜同不隱定。並指出目前上映緊嘅《奇異博士2：失控多元宇宙》雖然無緣中國市場，但開畫唔夠一星期就突破5億美元票房，而且考慮到中國票房分成比例比其他地方低，所以佢哋非常有信心，認為即使冇咗中國市場，即使喺中國發行電影遇上困難，亦無阻迪士尼電影成功。

Bob Chapek亦提到，並唔係所有迪士尼電影都無緣中國市場，就好似《Encanto（奇幻魔法屋）》同《Death on the Nile（尼羅河謀殺案）》等新作都能夠順利上映，而嚟緊嘅新戲亦會繼續送審。