疫情令大家冇得去旅行，加上近來日元非常低水，相信唔少人都期待去日本大玩特玩，而呢個願望或者最快下個月就可以實現。因為日本首相岸田文雄外訪英國時表示，會於下月仿傚其他己發展國家，開始放寬入境限制！我係咪可以執定行李啦？

首相岸田文雄昨日於英國宣佈放寬入境限制，而今日日本傳媒就引述多名政府消息人士指，目前政府係希望分階段逐步開放，而第一步係會先開放予人數較少、相對容易控制嘅小型旅行團訪日，而且最快5月內就可能會成事。而如果開放小型團唔會令日本爆發新一波疫情，政府就會於6月進一步放寬限制。

值得一提嘅係，消息指日本政府傾向以完成三針嘅外國人為入境對象，但目前未知是否硬性規定必須打哂三針先去到。另一邊廂，日本自3月起就容許「商務」或「特殊目的」旅客入境，近日亦有意將目前每日一萬人嘅入境人數限制，放寬到2萬人，以配合歐美等地逐步放寬嘅旅遊政策。

資料來源：FNN.jp