今年嘅奧斯卡頒獎禮剛巧遇上烏克蘭被俄國入侵，唔少人都希望大會安排特別環節予烏克蘭人民發聲，曾經親身飛去烏克蘭、目前正於波蘭紀錄難民情況嘅兩屆奧斯卡影帝Sean Penn就係其中一個，佢甚至「威脅」大會，如果不容許烏克蘭總統澤連斯基於頒獎禮發言，佢就會溶咗佢嗰兩座「小金人」。

圖片：Associated Press

其實早於上個星期，就已經有聲音指希望邀請澤連斯基「出席」奧斯卡。主持之一Amy Schumer 早前就曾公開確認，曾經向指大會提出，邀請烏克蘭總統澤連斯基於頒獎禮時作線上或錄像發言，甚至話佢自己會幫忙聯絡，「我唔介意做呢啲，但製作奧斯卡嗰個唔係我。」而Sean Penn於美國時間週日、頒獎禮前接受《CNN》訪問時就公開支持Amy Schumer嘅提議：「容許澤連斯基向大家發言，就係奧斯卡頒獎典禮能夠做到最好嘅事」，但佢同時亦指，「以我所知，頒獎禮主辦方就決定唔咁做；而澤連斯基想唔想做，就唔係我去講。」

圖片：Citas.in

Sean Penn補充：「如果主辦方選擇唔去支持目前為我哋擋緊子彈嘅烏克蘭領袖，以及佢哋正在保護嘅小朋友，咁我覺得呢個決定、佢哋每一個人，都會成為荷里活最污穢嘅時刻。」佢更呼籲大家杯葛頒獎典禮，「如果件事係真嘅，我就會公開溶咗我嘅獎座。」Sean Penn曾於2003年2008年，分別憑《懸河殺機》及《夏菲米克的時代》兩奪奧斯卡最佳男主角。「我希望事情唔會係咁，(若然屬實) 我希望大家唔好出席。」

撰文之時，奧斯卡頒獎典禮已經完結，而雖然典禮期間有多位主持、嘉賓、得獎人提起烏克蘭，但的確冇澤連斯基嘅發言。

資料來源：CNN