唔少人為咗慳錢，都會拉埋幾位朋友夾錢共用一個Netflix帳號，但日後可能就冇呢支歌仔唱喇！事關Netflix日前宣布將對「非同住者」共用帳號收取額外費用，即係Share帳號畀非同住成員要畀更多錢！

由於Netflix最貴月費計劃（Premium,$93）可以4個裝置同時使用，所以唔少人同朋友Share帳號甚至N人共享。雖則咁做其實係違反咗使用條款，只係官方向來都「隻眼開、隻眼閉」，並冇真係揸正嚟做，打擊有關行為。

然而，Netfix日前突然宣布推出「新增額外成員」及「轉移資料到新帳號」兩項新功能，表示Netflix標準及Premium高級計劃會員，能夠為最多2名「非同住者」新增子帳號，而每個子帳號都會有自己嘅登錄帳號密碼、個人資料、推薦內容，收費為每個子帳號2-3美元不等。由於官方預計新計劃會影響到唔少現有用戶，所以同時推出另一個功能「轉移資料到新帳號」，等目前Share緊帳號嘅朋友，就算第時被迫「拆夥」，都可以將舊帳戶播放清單、瀏覽紀錄等資料完整轉移到新帳號。

有關計劃將於秘魯、智利及哥斯達黎加三個拉丁美洲國家率先實施，但就唔知會唔會，或者幾時會擴展到全球有所地區，不過大家可以做定心理準備，第時共享Netflix帳號可能要畀多啲錢。