今個3月大家就忙於喺交界地尋求艾爾登法環，但你記唔記得上年3月你哋喺邊，做緊咩？係呀，上年三月大家仲喺神火村屠緊龍呀！而時隔一年，Capcom終於公佈《Monster Hunter Rise》嘅大型DLC，《Monster Hunter Rise: Sunbreak》嘅發售日，各位獵人係時候拎返部鋪哂塵嘅Switch出黎啦！

Capcom於昨日舉行線上發佈會，正式公佈有關《MHR: Sunbreak》嘅情報，佢哋指故事將會由大家熟悉嘅神火村據點，轉移到新地方「艾爾卡多」，美術風格亦似乎會由《MHR》嘅日本武士、轉成西方騎士再加些少大航海工業風咁。當然唔少得有新地圖、新主線、新技能、新武器，以及大家最期待嘅新魔物。發佈會上公佈嘅有被稱為「王域三候」嘅「剛纏獸」與「冰狼龍」，亦有天狗獸嘅亞種「緋天狗獸」，以及曾於3DS作品《X》及《XX》中登場嘅電龍。另外早前亦已經公佈會有古龍「爵銀龍」登場。

至於大家最關心嘅發售日期，就定喺今年6月30日，值得一提嘅係如果本身已經有《MHR》(不論係實體版定下載版)，如果只係想追加《Sunbreak》嘅內容，就一定要買《Sunbreak》嘅下載版，由今日起就可以預訂。另外Capcom亦承諾會如同《MHR》時一樣，遊戲推出後會繼續免費更新。