隨住烏俄戰事持續，愈嚟愈多國際企業加入制裁俄羅斯，日前瑞典家具品牌IKEA就宣布從4號起全面關閉俄羅斯及白俄羅斯所有分店，結果大量市民湧入門市作最後血拼，場面十分墟冚。

IKEA於昨日(3日)發聲明表示，烏克蘭發生嘅戰爭係一場人類悲劇，佢哋向數百萬受影響嘅人致上最深切嘅同情及關心。並表示戰爭已對人類造成巨大影響，同時導致供應鏈及貿易環境造成嚴重破壞，所以決定暫時停止俄羅斯及白俄羅斯業務。

消息傳出後，俄羅斯民眾紛紛各地分店瘋狂搶購，莫斯科、聖彼得堡、鄂木斯克等門市人頭湧湧，有市民仲好不捨咁攬住鯊魚公仔影相。預計IKEA今次決定會影響當地15,000名員工，暫時未知幾時會恢復營運。