人與人之間Friend唔Friend，好多時唔淨係睇你對佢好唔好、佢對你好唔好，更會睇大家對於第三者嘅態度好唔好，亦即所謂嘅「社交性評價 (Social Evaluation)」。過往就有個日本研究指，原來狗狗都會對主人以外嘅第三者進行社交性評價，即係你對狗狗主人好，狗狗就會對你好。而同一班研究員近來就將研究對象改為另一人氣寵物，家貓身上，結果呢…大家都估到啦？

今次研究方法同上次狗狗研究一樣。首先貓貓會見到主人嘗試，但未能打開一個裝有物品嘅透明盒，然後主人會向「第三者」求助，第三者就會按照研究員嘅指示，選擇幫個主人或者轉身離開，與此同時場內仲有個坐喺主人身邊，完全置身事外嘅「第四者」。進行完一系列互動之後，「第三者」同「第四者」會分別向貓貓提供一塊食物，研究員紀錄貓貓食或唔食二人提供嘅食物，黎決定佢對兩者嘅態度，再睇下與「第三者」一開始幫唔呀主人有冇關係。

講就講到好似好複雜，但個結論其實就好簡單：冇呀！冇關係呀！你隻貓係唔會因為其他人對你好或唔好，而改變佢對嗰條友嘅態度呀，簡單黎講，即係至少喺呢個研究環境之中，你隻貓分得好清楚，佢還佢，你還你，大家唔係一Team人黎架！大家河水不犯井水呀！

至於研究報告個結論當然就保守啲。佢話「貓嘅社交性評價行為與狗不一樣」，原因係大家養貓本身就唔係諗住佢會與自己合作 (對比於狗)，仲話如果往後要研究其他動物嘅「社交性評價」行為，就要考慮埋物種本身嘅社交性。

資料來源：Cats (Felis catus) Show No Avoidance of People Who Behave Negatively to Their Owner