相信有睇開動漫嘅朋友，都見識過少女口咬麵包趕返學嘅經典情節。最近盛產大米嘅新潟縣就忽發奇想，宣布推出「遲到飯糰少女計劃」，將口咬麵包變成口咬飯糰，拍晒廣告鼓勵大家食多啲飯。

據新潟縣官方所講，隨住飲食習慣改變，日本國內大米需求按年下降，其中早餐情況尤其嚴重，雖然有80%日本人晚餐會選擇食飯，但早餐會食飯嘅人只有50%。經分析後，佢哋認為背後原因可能同經典情節「少女口咬麵包趕返學」有關，事關呢一幕經常係動漫作品出現，久而久之令觀眾產生「早餐=麵包」嘅刻板印象。於是新潟縣就決定推出「遲到飯糰少女計劃」，以其人之道還治其人之身！

日前官方就率先推出第一條廣告，搵嚟女演員井頭愛海扮演即將遲到嘅女學生，口咬飯糰喺路上奔跑。根據官網嘅日程表，緊嚟應該會公開更多影片，唔知大家又對呢個計劃有咩睇法呢？