去年年尾同大家報導過，日本環球影城 (USJ) 將於今年初推出以《Monster Hunter: World》為主題，以VR (虛擬實景) 遊玩，而且玩家可以自由走動嘅《Monster Hunter: World Iceborne XR Walk》遊戲設施。近日設施正式開幕，網上亦有實機遊玩影片，不過要做一獵人似乎唔係大家想像中咁易。

上面呢段由日本傳媒《Oricon》發佈嘅影片，基本上可以睇哂整個設施嘅遊玩過程。一開始玩家要選出自己嘅角色、武器，然後聽主持人介紹下故事背景，之後就戴上VR裝備正式進入設施。可以睇到遊玩過程基本分成兩部份，首先係一段「VR觀光之旅」，玩家可以行一段路，透過VR眼鏡欣賞冰原景色同時搜集魔物痕跡；後一半就係利用手上武器對抗冰呪龍，同時亦可以利用大爆彈、地形等增加輸出。

圖片：截圖自Oricon on Youtube

驟眼睇，呢種360度可活動沉浸式體驗當然非常新奇有趣。但我就留意到於屠龍階段，幾位玩家基本上都冇移動過位置，條冰呪龍亦唔會如遊戲一樣跑黎跑去、飛黎飛去，整體都係企定定嘅「回合制」對打。假如你期望自己可以使出行雲流水嘅操作，應該就會失望而回。當然，更可能令你失望嘅，係你嘅體能。據知整套VR裝置重8kg，而整個遊玩過程大約係25分鐘，可想而知對玩家嘅體能都有一定要求。

所以，呢個新設施固然係將VR遊玩帶到一個新層次，但同時亦曝露咗VR目前最大嘅問題：機能質裝備限制下嘅活動性。距離大家能夠自由自在地於虛擬世界中探索，似乎都仲段距離。

資料來源：nordot