作為一個智力正常嘅普通人，大家應該知道「買咗本書」同「買咗本書嘅版權」係兩件非常唔同嘅事，但對於NFT團隊「SpiceDAO」黎講，呢個概念似乎就複雜到佢哋完全搞錯哂。事關佢哋近排用高價買咗本早期嘅《DUNE》小說，然後就諗住自己出動畫版。

佳士德拍賣行於去年11月舉行咗一個「珍罕書藉」拍賣會，其中一件拍賣品，就係一本於1975左右推出、屬最早版本嘅《DUNE》小說。小說預計拍賣價係25,000至35,000歐元左右，最後成交價卻升咗100倍去到266萬歐元 (約HKD$2300萬)，而買家正正就係NFT團隊SpiceDAO。

圖片：截圖自Chrities

SpiceDAO咁貴買本書黎做咩呢？睇返佢哋嘅討論區，最早係有人提出買咗呢本書，將佢每一頁都變哂做Jpeg再變成NFT，然後燒咗本書佢，咁啲NFT書頁就會成為世界僅存嘅「孤本」，永遠於區塊鏈上流傳，一方面展現技術上嘅創新、文化上嘅衝擊，而且仲係好好嘅噱頭添！成唔成功先唔好理，至少整件事係合理嘅。

SpiceDAO日前就於Twitter發文宣佈自己真係買咗本書，並列出接下來嘅計劃。奇怪嘅係同之前講嘅已經完全唔同哂。佢哋話會於法例許可嘅情況下公開本書所有內容，然後整一套原創嘅動畫系列賣畀串流平台，再用黎支持社區嘅其他計劃。

問題就黎啦！大家都知「買咗本書」唔等如「買咗本書嘅版權」，假若SpiceDAO真係整套《DUNE》動畫出黎，一定會被版權持有人、《DUNE》作家Frank Herbert家族成員持有嘅Herbert Proporties告到甩褲，Twitter網民亦對SpiceDAO呢個提案提出各種質疑及嘲諷。而且唔好唔記得，SpiceDAO係用咗比預估價高100倍嘅錢買本書返黎，成件事都令人難以理解。

SpiceDAO方面事後就再出一個Twitter Post，「解釋」咗佢成個計劃，但……我都唔知可以講啲咩，大家自己睇啦下。