注意：以下內容含有部份劇透！！！！！！

《Spider-Man: No Way Home（蜘蛛俠：不戰無歸）》熱潮席捲全球，截至目前全球大收16.25億美元票房，成功打入史上最賣座電影第8位，除咗帶動三代蜘蛛俠演員人氣急升，就連過往嘅女主角亦成為傳媒訪問對象。

最近初代蜘蛛俠女主角Kirsten Dunst接受雜誌《People》訪問，承認雖然未睇《No Way Home》，但知道Tobey Maguire有份參演，令佢感到非常驚喜，覺得能夠出演《蜘蛛俠》電影，成為《蜘蛛俠》嘅Fans確實係一件好Cool嘅事。其後被問到是否願意回歸《蜘蛛俠》嗰陣，Kirsten Dunst就即刻表示「當然好啦，我已經被人問過好幾次，呢個問題簡直唔使經過大腦思考。Mary Jane呢個角色係我職業生涯及人生重要嘅一部份。」

現年39歲嘅Kirsten Dunst，目前育有兩名小孩，歷年嚟勇於挑戰唔同角色，並喺2011年憑住《Melancholia（世紀末婚禮）》獲得康城影展最佳女主角獎封后，最新作品《The Power of the Dog（犬山記）》更獲得三個金球獎獎項。MCU多元宇宙存在無限可能，如果Kirsten Dunst回歸再扮MJ大家又覺得好唔好先？