「荷里活淨係會拍續集、外傳」其實就唔係咩新聞，甚至大受歡迎嘅MCU系列，嚴格黎講都係一套接一套嘅續集。適逢過去兩年疫情打擊電影業，無往績支持嘅新電影就更加難以上映。Ben Affleck近日於《Entertainment Weekly》接受多年好友Matt Damon訪問時，更大膽估計未來只會剩返Marvel等大IP「有資格」於戲院上映，其他電影將會全數轉去串流平台。

圖片：《The Last Duel》海報 via IMDB

二人先係談到近來合演、由Ridley Scott執導嘅《The Last Duel》。Matt Damon話電影嘅票房「明顯失敗」，但於iTunes卻成為最多人睇嘅電影，似乎代表呢類電影唔係冇人睇，只係啲人唔願意於疫情下入戲院睇，然後佢就問Ben Affleck認為疫情係加速咗呢個原本可能要10-15年先完成嘅改變，定係疫情過後一切都會回復正常？

而Ben Affleck就指，佢主演嘅《The Way Back》於2020年上映時，正好撞啱戲院因疫情休業，但其實佢一早就知呢部關於「悲傷、有個小朋友死咗、酗酒」嘅電影「冇辦法令成年人坐低睇」。而原因係「《Narcos: Mexico》、《Mare of Easttown》，串流平台上有呢啲好嘢，仲有《Roma》！」

圖片：《The Way Back》劇照 via IMDB

Ben Affleck甚至坦言：「如果要我估，《Argo》呢啲戲依家根本入唔到戲院——其實都唔係好耐之前嘅事——而係會拍成一部迷你劇 (limited series)。我估未來入到戲院嘅電影都係更大製作，更活動化 (event-ized)，而且絕大部份都係畀年輕人去睇，全部都係關於『Hey，我好鍾意Marvel宇宙，好想知佢黎緊會發生咩事』。到時可能一年有40部電影，全部都係大IP、續集、動畫。」

「《The Last Duel》就係壓倒我心中駱駝嘅最後一根稻草。我有拍過完全唔收得嘅爛片，我知點解啲人唔去睇，因為真係唔好睇。但我鍾意我哋做嘅嘢 (指《The Last Duel》，我好自豪！所以 (票房唔好) 我就好疑惑，直到我見到套戲喺串流平台OK，我就諗，原來啲觀眾喺呢到！」

圖片：《Argo》海報 via IMDB

簡單黎講，Ben Affleck其實係講緊觀眾嘅習慣已經改變，串流平台拍出好劇、好電影，加上疫情影響，大家都更情願喺屋企睇戲睇劇。當大家都習慣咗呢個模式，能夠、值得於戲院上映嘅，就只餘下如Marvel一樣針對年輕人、值得湊熱鬧、而且本身己經有一班忠實Fans嘅大IP、續集、動畫。

唔知大家又認唔認同Ben Affleck嘅睇法？