自2019年開始，奧斯卡頒獎禮就連續三年喺冇主持嘅情況下舉行，不過今年有望打破局面，事關有知情人士透露本屆將會恢復主持一職，並打算邀請MCU蜘蛛俠Tom Holland擔任！若然事成，相信會為節目提升唔少收視率。

由於疫情及其他原因，過去3屆嘅奧斯卡都冇主持，但日前Hulu Originals兼ABC Entertainment總裁Craig Erwich就透露今年將會回歸傳統，重設主持一職。至於邊個擔任，就有傳係上年12月曾表態「如果佢哋（奧斯卡）搵我，我一定會答應！」嘅Tom Holland，而大會亦都主動聯絡咗佢，未知最後能否成事。

對上一次有主持人嘅奧斯卡頒獎禮已經係2018年，當時由美國名嘴Jimmy Kimmel冧莊擔任，原定2019年係由黑人喜劇演員Kevin Hart接棒，但因為佢被爆出曾多次喺社交媒體發表恐同言論而辭任，之後就連續幾年都冇人做主持。相信如果今年由Tom Holland擔任，或能提升近年持續低迷嘅收視率。今屆奧斯卡提名名單將於2月8日公布，3月27日正式揭盅。