PS5缺貨、正常人買唔到已經係一眾機迷嘅共識，但呢個世界偏偏有啲人有辦法買到一大批PS5。好似日本有網友就發現，池袋某條內街嘅街邊放咗過百部PS5以及大量Xbox Series X，略為追查後發現，果然與某個自稱非常討厭日本嘅國家有關！

圖片：ikebukulog

卻說專門報導東京池袋區資訊嘅部落格「ikebukulog」版主「木菟」，日前於池袋著名ACG街道「乙女街」某條內街閒逛時，赫然發現某棟建物外放滿大量PS5及Xbox Series X紙盒，數量多到有如一幅牆將整個門口圍起。由於目前PS5供應不足，日本本土要買到都唔容易，所以同一個地方會出現大量PS5睇落就非常可疑。好奇心驅使木菟去調查一下，結果就發現，原來該棟建築物中，有一間叫「インフィニティ株式会社」、公司代表叫「李娜」嘅公司。

圖片：ikebukulog

圖片：截圖自ecworld.co.jp

據該公司嘅介紹，其公司業務係「家電零售及出口」，其網站上亦可以搵到標價98,500Yen (約HKD$6,650)、比起零售價貴咗將近一倍嘅PS5。木菟由此推斷，呢間「インフィニティ株式会社」，其實就係將PS5運返去某國嘅黃牛炒家。木菟亦提出證據，指Sony官方數字指PS5於日本本土賣出超過100萬部，但目前於日本銷量最高嘅《Resident Evil: Village》都只係賣出七萬幾隻，證明有大量「日本本土銷售」嘅PS5，最後並非落入日本人之手。佢估計，有將近50萬部於日本本土賣出嘅PS5，最後係運咗去海外。木菟亦慨嘆Sony方面不重視本土市場，「Playstation終於要從日本消失了」。

資料來源：ikebukulog