對於成長於九十年代嘅小朋友，當年最大型嘅「路線之爭」，大概就係Sony推出嘅Playstation鬥SEGA推出嘅Saturn。當時如果你擁有其中一部，你屋企會成為朋友們最想去嘅地方；如果你兩部都有，啲同學直頭係會對你發出仰慕嘅目光。而依家，你只需港紙100蚊鬆啲，就可以一次過擁有哂佢哋……嘅扭蛋玩具錶。

呢組日本新推出嘅扭蛋手錶一共有四款，當中包括灰色Saturn、白色Saturn，第一代Playstation，以及相對少見、賣點係連埋個Mon而且體積更細，等你可以帶出街打嘅PS One。四隻扭蛋嘅外型都跟足當年嘅主機，而打開個蓋後，就可以於個光碟位見到同樣充滿年代感嘅電子顯示時間。

更特別嘅，係四隻錶嘅「錶面」都用返當年大熱遊戲嘅正版光碟圖案，例如灰Saturn係《Virtual Fighter2》，白Saturn係《櫻花大戰2》，Playstation用1995年平台最暢銷遊戲《亞克傳承 (アークザラッド)》，而PS One就用上《大家的高爾夫》。呢Set扭蛋於日本係400Yen一個，好彩嘅話扭四次儲齊只需1,600Yen，即係HKD$108左右。百令蚊買童年回憾，值啦！

資料來源：nlab.itmedia