第79屆金球獎喺噚日宣布賽果，Andrew Garfield憑住《夢想期限tick, tick... BOOM!》成功奪得音樂或喜劇類最佳男主角封帝，但唔少網友都表示，單憑佢為咗唔劇透《Spider-Man: No Way Home（蜘蛛俠：不戰無歸）》而不斷扮傻講大話，早就值得擁有一座奧斯卡小金人。最近佢接受訪時就表示整個保密過程非常有趣，就好似玩緊一場大型狼人殺。

喺過往一年，一直盛傳歷代蜘蛛俠會喺《No Way Home》同框演出，其中二代蜘蛛俠Andrew Garfield仲俾人影到身穿蜘蛛服喺片場出現，之不過佢每次接受訪問時都死口唔認自己有份參演，仲好真誠咁話Marvel真係冇邀請佢，叫大家唔好咁多幻想，否認只會大失所望。到後來甚至有片場照流出，佢依然繼續扮傻話張相只係Photoshop，但最後結果係點我諗就算未睇嘅朋友都知道。

片場照流出。

Andrew Garfield堅決否認有份參演，表示張相只係PS。

日前Andrew Garfield接受外媒《The Wrap》訪問時就提到保密工作感受，表示整個過程雖然壓力好大但同時亦好有趣，就好似同世上每位蜘蛛俠Fans玩緊一場大型狼人殺（Werewolf）。「玩過狼人殺嘅人都知，如果你係狼人必須要沉住氣承受壓力，而且仲要當朋友面講大話，說服對方相信自己係好人，確實令人非常刺激。」

資料來源：The Wrap