為慶祝《哈利波特：神秘的魔法石》上映20周年，HBO拍攝特別節目《哈利波特20周年：重返霍格華茲》，邀請昔日多位童星演員重返霍格華茲，訴說當年拍攝各種經歷及心得。之不過當預告片及宣傳海報公開後，唔少人都質問原作者JK羅琳（J.K. Rowling）去咗邊？據英媒《The Independent》最新消息，羅琳確實會喺節目現身，只不過係透過舊有片段出現咁解。

據《The Independent》報導，節目當中有一幕係「哈利」Daniel Radcliffe、「海格」Robbie Coltrane以及「金妮」Bonnie Wright三人提到羅琳，並感謝佢嘅貢獻。當「金妮」表示好多人鍾意羅琳嘅作品嗰時，「哈利」就補充大眾曾經都認為「閱讀已死」，但羅琳成功推翻呢套說法。而「海格」亦非常讚同，指自己欣賞羅琳其中一個原因，就係佢成功令數以百萬計原定唔會再睇書嘅人，都拎返起本書嚟睇，從中意識到寫作嘅力量。

然後話題就轉到去「哈利」演員選角問題，並播出羅琳喺2019年拍攝嘅舊片，談及當年物色「哈利」演員嘅過程。若然消息屬實，都可以叫做有「現身」嘅...總好過一個畫面都冇。節目將於2022年1月1日喺HBO Max/Go播出，有興趣嘅朋友請密切留意。

創作出《哈利波特》系列嘅人氣作家JK羅琳，去年因發表「天生有月經嘅女人先係真正嘅女人」等言論，加上同年新作《Troubled Blood》描述一名連環殺人狂有易服癖，鍾意男扮女裝殺人，而引起跨性別族群權益人士不滿，批評佢係「恐跨人士」，Twitter亦充斥大量「#RIPJKRowling」帖文，結果《哈利波特》多位演員即刻同佢割蓆。