Emoji已成為大家日常溝通不可或缺嘅元素，有時一個簡單嘅emoji勝過千言萬語，同時令對話增添趣味，但隨住潮流改變，部份emoji亦會衍生更多含意，就好似曾經好多人用嘅「懇求臉（pleading face）」，近年就因為被指同「乞求性愛」意思有關而人氣下滑。

據英媒《Metro》報導，「懇求臉」呢個八字眉水汪汪大眼，一臉無辜嘅表情符號，原本係代表懇求幫助或感動嘅意思，更曾經喺2020年上半年一度成為Twitter前三名受歡迎嘅emoji，但近年使用量就持續下跌。

Emojipedia副表情符號官Keith Broni指出，由於外國社交媒體近年流行將「懇求臉」同「Simp」行為連結埋一齊（Simp為Simpleton縮寫，指對心儀女仔無條件付出嘅男仔，簡單嚟講即係觀音兵），令「懇求臉」變得帶有性意味、「求歡」嘅意思，彷彿用呢個表情符號就係表達緊「想與你做愛」咁解，所以就少咗人用。事實上，emoji講到尾都係一個符號，會隨潮流改變衍生出各種意思，而且唔同族群亦會有各自嘅解讀，例如「火箭」都被reddit網友當作股價一飛沖天、「鑽石之手」就係strong hold咁解，我諗香港應該暫時冇咩人覺得「懇求臉」係有性意味嘅，大家可以繼續放心使用。