每逢農曆新年，最好就係睇闔家歡賀歲片笑餐飽，開開心心咁迎接新一年！由《逆流大叔》導演陳詠燊編導監，黃子華、鄧麗欣、張繼聰、林明禎、王菀之以及陳湛文主演嘅賀歲喜劇《飯戲攻心》就喺今日公開最新預告，約定大家新年見。

短短唔夠2分鐘嘅預告，就顯示出六位主演錯綜複雜嘅關係，二佬（張繼聰）女朋友（鄧麗欣）係大佬（黃子華）前度，大佬為免餐餐食飯都背脊骨落，就搵嚟KOL小喵（林明禎）做女友，而三弟（陳湛文）就有一個廚藝了得嘅女朋友（王菀之）。三男三女同一屋簷下生活，漸漸擦出唔正常嘅愛的火花，大佬女友密室情挑三弟，而二佬女友又好似同大佬餘情未了，唔知劇情會點發展呢？

除此之外，六位主演早前就惡作百老匯院線《戲院禮儀片》，搵嚟小克重新填詞整咗首宣傳歌《飯氣歌》。