由吉岡里帆及星野源主演嘅日清丼兵衛烏冬杯麵廣告向來極具人氣，兩人自2017年起合作過一個又一個令人印象深刻嘅小故事，之不過隨住星野源結婚，上次廣告已經冇佢份，得返「吉岡里帆」孤伶伶一個，並將象徵住星野源嘅黑框眼鏡掉埋出街。正當大家以為星野源從此byebye，日前佢就喺最新一集廣告再度現身！

今次日清丼兵衛分別搵嚟星野源、搞笑藝人「こがけん」以及「とろサーモン」三人，各自同小狐狸吉岡里帆拍咗一條30秒嘅廣告片。雖然三條廣告片看似獨立，但又存在一種詭異嘅關連，除咗房間裝修布置幾乎一樣，其中星野源版本入面，兩人對戲嗰時更傳嚟另外兩條廣告嘅對白。

官方所公開嘅3人合輯版本更展示出三位男主角其實身處同一棟大廈，除咗佢哋之外仲有N個小狐狸吉岡里帆，然後鏡頭一轉就見到3個工作人員喺控制室監視住所有畫面，非常詭異，唔知日本日清係咪又有咩新計劃呢？

同場加映過往多集丼兵衛廣告合輯。