一講起恆香老餅家，你第一時間會諗起咩? 我諗無10成都9成9會諗起老婆餅，咁佢最出名係老婆餅相信無人反對，但黎緊可能會多一樣野比大家記住，就係冰室啦！

自1920年創立至今，恆香老餅家一直都係傳統中式餅店，無論係老婆餅，臘味定月餅等都非常深入民心，不過佢地近年唔再僅止於此，佢地除左開始推出新產品酥皮月餅之外，近日亦於上環帶來全新恆香冰室，嘗試將傳統店餅混合冰室文化，唔知又掂唔掂呢?

唔好以為恆香一直都係做唐餅起家，其實佢地於1920年係先以傳樓茶樓見人，到1940年再轉為「恆香酒家」，除左做點心仲做埋小菜，其後於1970先轉為製作唐餅至今。而黎到今日，恆香決定重返飲食界，決心以奶茶加老婆餅為主題，睇下可唔可以融入中上環嘅都市生活，並希望可以比年輕上班族更認識恆香品牌。

恆香冰室除左有老婆餅之外，亦提供多款新鮮出爐糕餅面包，於冰室較少見嘅皮蛋酥、蛋黃酥都有得食。不過最開心嘅係，喺冰室入面可以食到新鮮出爐嘅老婆餅，呢一點係比以往多數買走黎食正得多。

而冰室必備嘅沙爹牛肉面，亦可以話非常特出，沙爹汁非常香濃，絕對係屬於高質，食過你就會明白。

另外，雪花黃金奶黃流心西多士都係誠意及特別之作，將平常嘅花生醬換成流心奶黃，但又異常夾喎！

最後要讚嘅係佢地嘅招牌炒飯，加入臘腸去炒，非常香口，而炒飯亦乾食，絕對係值得一試的！

地點：上環德輔道中243-247號德佑大廈地下