正所謂先敬羅衣後敬人，除咗平時追女仔，男士們見工面試、見客、出席隆重場合，少不免都會Gel返個頭，但求畀人一種乾淨企理，精神十足嘅感覺。之但係呢，呢啲咁重要嘅嘢學校往往都唔會教，好多時都係靠自己無數次Gel衰咗，洗頭，再Gel衰再洗頭嘅經驗累積返嚟。最近日本有間男高中，就專門請人返嚟教學生哥們護膚及適當Gel頭，當作「紳士教育」嘅一部份。

最近位於東京嘅男子高中「正則学園高等学校」透過問卷調查，詢問同學們期望學校表現出乜嘢校風，結果大部份同學仔都希望學校可以畀人一種「型格集團」、學生都係紳士嘅感覺。於是學校喺上個禮拜就舉辦咗場特別講座，搵嚟美容及護髮品牌「Mandom」員工，向150名15-16歲嘅高一學生哥講述護膚及Gel頭知識，既有理論教學又有實踐，成班排排坐喺禮堂一齊Gel頭。

對於呢個特別講座，日本網友們都一致好評，更希望其他學校都可以仿傚。值得一提嘅係，呢個課程重點係儀容整理，並唔係教學生哥要整色整水。如果當年學校都有類似嘅講座，大家又會唔會參加呢？

資料來源：日テレNEW