Mirror宜家嘅威力有幾勁真係唔使我多講，當有品牌搵佢地代言，個件產品基本上一定被掃清光。而近日CSL就搵齊12子代言，梗係令一班鏡粉再一次瘋狂。

而呢次12子代言，每人都有專屬簽名海報送番比客戶，但要儲齊12張一啲都唔容易，因為申請$298月費計劃就只能夠獲得1張海報，而$398計劃就只有3張海報，所以想要齊12張起碼就要申請4個$398計劃。

因此，網上就有人將呢啲海報放上網炒賣，最誇張的一個Post開價$99,999全套海報，即係要成10萬，平均1張海報要$8333，認真係食人隻車，但賣家卻表明自己「我哋一定唔係最貴」。

雖然呢套海報開價咁高，但事實上鏡粉消費力相當驚人，絕對唔排除真係有Fans為左儲齊一套而大灑金錢。不過由於呢個10萬蚊Post被網上傳開，令賣家被迫收歛，將賣價大幅調低。