自疫情出現開始，唔少公司都推出WFH政策，雖然看似好爽唔使同人迫地鐵返工放工，但試過嘅朋友應該明白WFH只會變相有返工冇收工，就算過咗辦公室時間，老細上司都會失驚無神彈個email/whatsapp畀你，幾乎24小時on call搞到食唔安瞓唔落。最近葡萄牙就通過咗一條令打工員好「葡萄」嘅新勞動法，規定老細唔可以喺辦公時間外聯絡員工！

據外媒Euronews報導，日前葡萄牙議會通過一條新勞動法，旨在保障員工WFH都能夠Work-life Balance，規定老細唔可以監視WFH員工（聽聞有老細要求開ZOOM證明做緊嘢），亦都唔可以係返工前或放工後聯絡員工，違反相關將處以罰款。

另外，法例亦規定公司需要支付員工因WFH而產生嘅額外費用，例如上網費或電費，但唔包水費。同時為咗減少員工WFH嘅孤獨感，公司至少要每2個月舉行一次face-to-face嘅會議，而身為父母，仔女又未滿8歲嘅員工，更可以自行決定是否WFH，毋需事前同老細商量。

葡萄牙勞動及社會保障部部長Ana Mendes Godinho表示，希望建立健康嘅遙距工作文化，吸引嚟自世界各地嘅遙距工作者移居到當地。