日本甲賀之里忍術村每年都會舉辦《全日本忍者錦標賽》，號召各地好手聚首一堂角逐「日本第一忍者」頭銜。最新一屆賽事亦喺日前正式展開，不過就冇大家想像中嘅誇張忍術，而係多項體能、眼界以及身體協調挑戰。

根據官方數據，今屆比賽總共有84名忍者參加，年齡介乎於16-62歲。賽事包括投擲手裡劍、跳欄杆、爬牆、水上奔跑以及水蜘蛛多個環節，並採用積分制計算，完賽後最高分者將會成為「日本第一忍者」。

參賽者們都著上忍者服悉心打扮一番，仲好似用服裝顏色嚟分黨分派。

其中最搞笑嘅環節莫過於水上奔跑，各位忍者需要快速踩過浮板先唔會跌落水，結果好多人跣腳變晒做海底奇兵，而本身個關卡設計亦充滿搞笑綜藝味道。