疫情衝擊全球經濟下，各國政府都曾經推出各種疫情補助，例如香港政府推出「保就業」，而美國政府亦有「經濟損失災難貸款計劃 (EIDL)」，協助中小企支付租金、水電煤等營運費用。但一名美國男子日前就被揭發謊報資料以詐取貸款，然後拎咗45萬港紙去買一張，注意係「一張」Pokemon卡。

該名男子名叫Vinath Oudomsine，居於美國佐治亞州都柏林市。據報此男子於去年7月向美國當局訛稱自己擁有一間創立於2018年、有10名員工、年收達23.5萬美金 (約HK$180萬) 嘅公司，於是美國當局向其批出8.5萬美金 (約HK$66萬)嘅貸款——係貸款呀下，有3.75%息架，而且借貸條件講到明必須用於企業營運，而且一定要還冇得豁免——然後於今年年初用咗當中嘅5.8萬美金 (約HK$45萬) 去買咗一張Pokemon卡。事情被揭發後佢就被當局以電匯詐騙罪提告，最高刑罰為監禁20年，以及25萬美金 (約HK$194萬) 罰款，另名還返嗰23.5萬貸款。

史上最貴Pokemon卡 「比卡超插畫家」

圖片：PWCC

值得一提嘅係，案情文件中並無提及究竟呢位男子用45萬港紙買咗邊張Pokemon卡，但如果佢冇被人呃，呢張卡一定非常珍貴。事關翻查紀錄，5.8萬美金呢個成交價足以打入有史以來最貴Pokemon卡嘅頭10名。而目前最貴Pokemon卡嘅紀錄，就係一張於1998年推出，作為當年日本漫畫雜誌《Coro Coro Comic》兒童插畫比賽優秀賞獎品嘅「比卡超插畫家」特別卡。此卡只有40張，其中一張曾於PWCC以37.5萬美金 (約HK$290萬) 成交。