有玩《英雄聯盟》（League of Legends）嘅朋友，都知道遊戲內嘅聊天頻道甚少用嚟討論戰術，更多時候係俾隊友或敵人嘴炮（或者你嘴炮人哋啦），久而久之形成一種言語謾罵風氣。有見及此，日前Riot Games宣布將於下一個遊戲版本關閉 [所有人] 聊天功能，換言之各位玩家唔可以再同敵人「交流」，但仍然可以同隊友聊天（嗌交）。

（圖片截自：notagamer.net）

根據Riot Games說法（中文/英文版本），雖然 [所有人] 聊天頻道可以令兩隊人馬展開有趣互動同埋開下玩笑，但目前負面互動已經超過正面互動，為改善言語謾罵問題，只好作出權宜之計關閉 [所有人] 聊天功能。有關變更將會從下個版本（11.21版本）開始生效，雖則敵人睇唔到你嘅文字，但仍然可以見到你Show專精/表情以及CTRL+1/2/3/4等英雄動作。

官方亦坦言關閉 [所有人] 聊天頻道唔能夠完全解決言語謾罵問題，皆因辱罵情況更多時候出現喺隊友之間，但考慮到隊伍聊天室仍然有團隊協調作用，就算會帶嚟一啲負面體驗都決定保留。